- Nov 21 Fri 2008 14:22
出院喇
尋日終於接番我部相機返屋企, 好彩無嘜事咋. 仲聽咗啲影燈飾嘅心得潻. 唔知到時識唔識用番出嚟呢 ? 跟住就行晒港島東嘅大型百貨公司, 但都無買啲嘜呀! 早知就去 '一田' 一轉啦.
- Oct 31 Fri 2008 13:48
冠軍中嘅冠軍
話說我尋日放咗假, 我啲入數嘢都要做咖. 咁我同事 '丹山張' 就會幫我搞掂佢嘅. 今日一返嚟嘢都唔食就對下條數先啦. 都已經覺得唔係幾對路, 但係正常賽果無驚喜. 跟住佢俾番啲 copy 我仲同我講 '肥鴨, 我呢張唔識入呀!' 我心諗都好吖, 起碼我知你無入吖. 但點解都唔啱數嘅? 咁當然係逐條對啦. (好彩 15 張票啫)
- Oct 31 Fri 2008 00:06
整相機
今日放咗一日假, 所以終於有機會拎部相機返去舊公司整. 經 '唔熟同事' 初部檢查, 佢竟然話係新症從未見過, 要詳細研究下. 後來有個師傅出嚟見到就話係重症, 好難搞嘅. 但當老師傅出嚟就話小事. 不過最終都係要放底 check 下, 佢哋仲話出咗新款叫我不如換咗佢. 唉 ~ 大哥, 宜家咁嘅時勢仲七千蚊買部相機 ! Cash is king!! 雖然又話高清又可插 16 G 卡. 但個款仍然都係一樣喎. 而且可能我學用大相機呢~ 睇下部機搞成點先算啦.
跟住又捉住個舊同事傾咗一大輪, 打攪晒~
- Oct 23 Thu 2008 00:55
'六月' 飛霜
大老爺, 伸冤呀! 有無攪錯呀, 都差不多十一月啦. 點解 '六月' 會返轉頭咖. 簡直人都癲. 話說早兩日返工响樓下就見到 '六月' 喎, 佢失驚無神同我打招呼呀, 嘩! 當堂髮尾一陣涼. 我响樹做咗三年佢從來都無主動同我打招呼咖, 嚇得我吖. 我估佢唔係咁天真同傻, 諗住我會好熱情咁同佢扮熟呀~
- Oct 19 Sun 2008 23:19
又一年
轉下眼一年又過去喇. 過去一年做過啲嘜呢 ? 接咗幾個炸彈啦~ 走咗唔知幾多人啦~ 但都唔知點解最應該走嘅始終仲响樹. 公司搬咗啦~ 對於我嚟講除咗交通費多咗外就係多咗好多位用, 但因為都係未有時間影相所以... ... 遲啲啦, 一定影嘅.
- Jul 15 Tue 2008 17:49
入伙飯
公司終於都搬咗喇. 上個禮拜仲响樓下 '大榮華' 食咗餐入伙飯潻. 好彩我最最最唔鍾意嘅人(s) 無同我坐埋一枱啫. 我哋嗰枱就梗係食得開心食得放心啦, 但又因為咁我 miss 咗啲正嘢呀. 話說原本我係諗住同 'O仔' 啲兄弟坐嘅, 點知 '粗口K' 同 '通叔'註 已經坐咗响樹喇. 咁我唯有叫啲姊妹俾個位我同 '天使長' 坐啦. 原來 '通叔'註 到嘅時候係問咗啲兄弟. '有無分部門, 有無分啲嘜咖?' 點知 'O仔' 嘅 '愛德華' 就同佢講 '有咖, 有分咖.' '通叔' 又問番佢喎 ' 咁你即係介意我坐落嚟啦!' '係咖! 係咖!' 死未~ 但呢餐飯先係啱啱開始啫. 之後 '通叔' 又問人喎. '其實男厠駛唔駛用鎖匙咖?' 咁啲兄弟就覺得奇怪喇. '我哋都搬咗嚟咁多日啦, 你無去過厠所咖?' '哦~我之前都係食 lunch 時去埋咖~' 原來條友 cheap 精嚟咖, 以前都係唔會配鎖匙咖. 跟住 '愛德華' 又出手喇, 佢好正經咁同佢講, '唔駛鎖匙咖, 你行埋去同隻門講 芝麻開門 就得咖喇!'
註:原本我會稱呼佢為 '東尼叔' 但 '威爾遜' 話佢應該叫 '通叔' 喎, 都啱嘅, 因為佢同 '通縮' 一樣令人咁煩呀!
- Mar 10 Mon 2008 22:48
紅腸回憶錄 - 出單篇
轉眼 '紅腸' 就走咗三個月喇. 唔係放病假都無時間 update 佢啲嘢潻. 咁一定有啲甩漏喇, 但大部份都好攪笑, 實在唔捨得唔同你哋分享呀. 知情嘅就忍受下啦, 要照顧下啲舊友嘛. 或者有嘜嘢錯咗要話番俾我知喎~~
- Jan 31 Thu 2008 16:09
'寒' 之旅
講番去番禺嘅旅程, 星期六我 check 過天氣預測話得嗰 7-12 度. 咁我都係帶咗件厚啲嘅衫一條牛女褲就已經好似好多嘢喎. 去到車站見到團友 '甲乙丙丁' 我就覺得自己好誇張喇. 個個都係好似去街咁, 至多個袋係多少少嘢. 但去到皇崗過關嘅時候, 我就知我唔會後悔喇. 嘩! 癲癲哋咖, 差啲攪到我花容失色, 因為我唔係好鍾意凍咖. 唉~~ 原來沖涼個熱水又壞嘅, 花洒水力又慢. 不過價錢都算 ok , 啲馬戲, 動物園都抵去嘅. 米當去體驗生活囉. 而且係 '寒' 之嘛, 都唔凍 !!!
- Jan 29 Tue 2008 13:43
郁高拜拜
尋日亞sir同我講佢已經叫咗郁高唔駛再返工, 我只係好冷淡咁答咗佢一聲 '哦!' . 一來佢上個禮拜都已經同我講咗話唔要佢, 二來佢又唔係做我啲嘢, 關我鬼事呀! 而且亞小姐第一日已經同我講由佢屋企返公司好唔方便, 我心諗見工時已經知啦. 又覺得入數悶, 又嫌唔夠多樣化. 傻傻哋咖, 唔做就罷啦.
- Jan 20 Sun 2008 17:05
好鬼忙
自從亞域開始接手做 PSI 嘅嘢, 佢就完全無跟 PON 嘅嘢. 佢有日仲問我, '肥鴨呀, 你仲理唔理 PON 嘅嘢 ? ' 我聽完當堂火到嚟埋, '你有無倒轉咗啲嘢嚟講 ?! 係你仲理唔理 PON 嘅嘢而唔係我囉! 無人理嘅嘢我先跟啫!' 而佢至多都係聽下 Hotline 打嚟嘅電話, 追 refund 嘅就會叫我去跟. 如果其他嘢我就唔知佢有無去跟喇. 我只知道兩個禮拜每日要入一大堆嘅入數紙, 百幾張支票嘅數,仲要跟 Hotline 嘅 email. 之前原來佢入漏咗幾十張入數紙, 有啲又入錯咗, Hotline 啲人唔知就走去追客俾客投訴. 於是我又要去補入番晒. 咁當然亞 Sir 都有入錯嘢嘅.而新嚟嗰個姐姐 - 郁高, 做咗一個禮拜就問我, '我除咗做呢啲, 仲有嘜嘢做呀? ' '哦~~除咗呢啲都仲係呢啲囉! ' '吓! 好悶喇. 唔係要開單咩!' '吓, 咁你問下亞域同亞 sir, 睇下佢點安排俾你囉! '頂! 亞 sir 俾 PON 啲嘢你, 你又借頭借路唔做! 我得鬼閒理你呀 !